ຂ່າວດ່ວນ

ຂ່າວອື່ນໆ

random

ຕວກ​ກີ ແລະ ຣັດ​ເຊຍ ປະ­ຕິ­ບັດ​ການ​ໂຈມ​ຕີ​ທາງ​ອາ­ກາດ​ຢູ່​ທາງ​ພາກ​ເໜືອ​ຊີ​ຣີ

ຂ່າວ­ສານ Reuters ອ້າງຕາມ​ແຫຼ່ງ​ຂ່າວ​ຂອງ​ກອງ­ທັບຕວກ​ກີ ໃຫ້​ຮູ້​ວ່າ ເຮືອ­ບິນ​ຖິ້ມ​ລະເບີດຂອງ​ຕວກ​ກີ ແລະ ຣັດ​ເຊຍ ໄດ້​ປະ­ຕິ­ບັດ​ການ​ໂຈມ​ຕີ​ລົງ​ໃສ່ຖານ​ທີ່​ໝັ້ນ​ຕ່າງໆ​ຂອງ​ກຸ່ມ​ລັດ​ອິ​ສລາມ (IS) ຢູ່​ໃນ​ເຂດ​ທາງ​ທິດເໜືອ ປະ­ເທດ​ຊີ​ຣີ.

ຂ່າວ​ແຈ້ງ­ວ່າ ກອງ­ທັບ​ອາ­ກາດ ແລະ​ ກຳ­ລັງ​ທະ­ຫານ​ປືນ​ໃຫຍ່​ຂອງຕວກ​ກີ ໄດ້​ສັງ­ຫານ​ນັກ­ຮົບ IS ຢູ່ໃນ​ຊີ​ຣີ ໄດ້ 22 ຄົນ ໃນ​ວັນ​ທີ 1 ມັງ­ກອນ​ນີ້ ນອກ­ຈາກ​ນັ້ນ­ແລ້ວ ກອງ­ທັບ​ຊີ​ຣີ ຍັງ​ໄດ້​ປະ­ກາດ​ວ່າ ເຮືອ­ບິນ​ຂອງ​ຣັດ​ເຊຍ ໄດ້​ຍິງ​ທຳລາຍ​ເປົ້າ​ໝາຍ​ຈຳ­ນວນ​ໜຶ່ງ​ຂອງ IS ຢູ່​ໃນ​ພື້ນ​ທີ່ນະ­ຄອນ ອາ​ລ-ບັບ (ພາກ​ເໜືອ​ຊີ​ຣີ).
ກ່ອນ​ໜ້າ​ນັ້ນເມື່ອ​ທ້າຍ​ເດືອນທັນ­ວາ​ປີ​ກາຍ ປະ­ທາ­ນາ­ທິ­ບໍ­ດີ​ຣັດເຊຍ ວາ​ລາ​ດີ​ເມຍ ປູ​ຕິນ ຖະ­ແຫຼງວ່າ​ ໄດ້​ບັນ­ລຸ​ຂໍ້​ຕົກ­ລົງກ່ຽວ​ກັບ​ຄຳສັ່ງ​ຢຸດ​ຍິງ​ຢູ່​ໃນ​ຊີ​ຣີ ເອ­ກະ­ສານ 3 ສະ­ບັບ ໄດ້​ຮັບ​ການລົງ​ນາມ ລະຫວ່າງ​ລັດ­ຖະ­ບານ​ຊີ​ຣີ ກັບ​ຝ່າຍຄ້ານ ກ່ຽວກັບ​ການ​ຢຸດ​ຍິງ​ຢູ່​ໃນຊີ​ຣີ ເຕົ້າ­ໂຮມ​ບັນ­ດາມາດ​ຕະການ​ຕິດ­ຕາມ​ກວດ­ກາ​ກ່ຽວ​ກັບການ​ຢຸດ​ຍິງ ປະ­ກາດ​ຄວາມ​ພ້ອມໃນການ​ເລີ່ມ​ການເຈລະ­ຈາ​ສັນຕິ​ພາບ ກ່ຽວ​ກັບ​ການ​ແກ້​ໄຂ​ບັນຫາ​ຊີ​ຣີ ຂໍ້​ຕົກ­ລົງ​ດັ່ງ­ກ່າວບໍ່​ໄດ້ລວມ​ເຖິງ​ກຸ່ມ​ກໍ່​ການ​ຮ້າຍ ແນວໂຮມ ອາ​ລ ນູ​ສຣາ ແລະ IS.
ຫຼ້າ​ສຸດ​ມາ​ໃນ​ວັນ​ທີ 2 ມັງ­ກອນນີ້ ກຸ່ມ​ກະ­ບົດ​ໃນ​ຊີ​ຣີ ລວມ​ປະມານ 10 ກຸ່ມ ໄດ້​ແຈ້ງ​ໃຫ້​ຮູ້ເຖິງການ​ໂຈະ​ການ​ເຈລະ­ຈາ​ສັນ­ຕິພາບ ທີ່​ໄດ້​ວາງ​ແຜນ​ຈັດ​ຂຶ້ນ​ໃນເດືອນ​ນີ້ ທີ່​ນະ­ຄອນ­ຫຼວງ​ອາ​ສ​ຕານາຂອງ​ກາ​ຊັກ​ສ​ຖານ ໂດຍ​ກ່າວຫາ​ຝ່າຍ​ລັດ­ຖະ­ບານວ່າ “ລະເມີດ” ຂໍ້​ຕົກ­ລົງ​ຢຸດ​ຍິງ​ເທື່ອ​ໃໝ່ ທີ່​ໄດ້­ແກ່​ຍາວ​ເປັນ​ເວ­ລາ 4 ວັນ (ເລີ່ມ​ແຕ່​ວັນ​ທີ 30 ທັນ­ວາ 2016).
ຂໍ້​ຕົກ­ລົງ​ໃໝ່​ຫຼ້າ​ສຸດ​ດັ່ງ­ກ່າວມີ ຣັດ​ເຊຍ ແລະ ຕວກ​ກີ ເປັນຕົວກາງ​ໄກ່​ເກ່ຍ ແລະ ມີ​ການ​ເຂົ້າຮ່ວມ​ຂອງ​ກອງ​ກຳ­ລັງ​ຝ່າຍລັດ​ຖະບານ­ຊີ​ຣີ ແລະ 7 ກຸ່ມ​ປະ­ກອບ​ອາວຸດ​ຝ່າຍ​ຄ້ານ ​ທີ່​ມີ​ມື​ປືນ​ປະ­ມານ 60.000 ຄົນ ໂດຍ​ບໍ່​ລວມ​ເຖິງກຸ່ມ IS ແລະ​ພວກ​ມື​ປືນ​ທີ່​ຂຶ້ນ​ກັບແນວ​ໂຮມ ອາ​ລ ນູ​ສຣາ ຊຶ່ງ​ມີການ​ພົວ­ພັນ​ກັບ​ກຸ່ມ​ກໍ່​ການ​ຮ້າຍສາ­ກົນ ອາ​ລ ໄກ​ດາ.
ຕວກ​ກີ ແລະ ຣັດ​ເຊຍ ປະ­ຕິ­ບັດ​ການ​ໂຈມ​ຕີ​ທາງ​ອາ­ກາດ​ຢູ່​ທາງ​ພາກ​ເໜືອ​ຊີ​ຣີ Reviewed by makarow on 11:57:00 PM Rating: 5

Contact Form

Name

Email *

Message *

Powered by Blogger.