ຂ່າວດ່ວນ

ຂ່າວອື່ນໆ

random

ກາຕາຣປະຕິເສດຂໍ້ຮຽກຮ້ອງ 13 ຂໍ້ຂອງຊາດອາຫລັບ


 ເຊກ ໂມຮັມເຫມັດ ບິນ ອັບດຸລຣາມານ ອັລ ທານີ ລັດຖະມົນຕີຕ່າງປະເທດກາຕ້າຖະແຫລງວ່າ ບໍ່ສາມາດຍອມຮັບເງື່ອນໄຂ 13 ຂໍ້ ທີ່ສີ່ຊາດອາຫລັບຮຽກຮ້ອງໃຫ້ກາຕາຣປະຕິບັດຕາມ ເພື່ອແລກກັບການຍົກເລີກມາດຕະການຄວ່ຳບາດ ເນື່ອຈາກຂໍ້ຮຽກຮ້ອງດັ່ງກ່າວບໍ່ມີຄວາມສົມເຫດສົມຜົນໄດ້ບໍ່ສາມາດນຳໄປປະຕິບັດໄດ້ຈິງ

ກ່ອນໜ້ານີ້ຊາອຸດິອາລາເບຍ ອີຢິບ ອະຫະລັດອາລັບອິມີເຣດ(ຢູເອອີ) ແລະບາເຣນ ໄດ້ຍື່ນຂໍ້ຮຽກຮ້ອງ 13 ຂໍ້ແກ່ກາຕາຣ ຊຶ່ງລວມເຖິງການໃຫ້ປິດສະຖານີອັລຈາຊີຣາທີ່ລັດຖະບານກາຕາຣສະໜັບສະໜຸນເງິນທຶນ ໃຫ້ລຸດລະດັບຄວາມສຳພັນທາງການທູດກັບອີຣ່ານ  ແລະໃຫ້ປິດຖານທັບຕຸລະກີໃນປະເທດ ໂດຍໃຫ້ເວລາດຳເນີນການຕາມຂໍ້ຮຽກຮ້ອງພາຍໃນ 10 ວັນ ນັບແຕ່ວັນທີ 23 ມີຖຸນາ 2017 ເປັນຕົ້ນມາ

 ແມ່ນວ່າທາງໂຄສົກລັດຖະບານກາຕາຣລະບຸວ່າ ລັດຖະບານກຳລັງພິຈາລະນາເງື່ອນໄຂທັງ 13 ຂໍ້ຢູ່ ແຕ່ລັດຖະມົນຕີຕ່າງປະເທດກາຕາຣຊີ້ວ່າ ຂໍ້ຮຽກຮ້ອງດັ່ງກ່າວບໍ່ກົງຕາມຂໍ້ສະເຫນີແນະຕາມທີ່ລັດຖະມົນຕີຕ່າງປະເທດອາເມລິກາ ແລະອັງກິດກ່ອນໜ້ານີ້ ຊຶ່ງໄດ້ຂໍໃຫ້ ສີ່ຊາດອາຫລັບສະເໜີຂໍ້ຮຽກຮ້ອງທີ່ສົມເຫດສົມຜົນ ແລະສອດຄ່ອງກັບສະພາບຄວາມເປັນຈິງ

"ຂໍ້ຮຽກຮ້ອງ 13 ຂໍ້ນີ້ເປັນຫລັກຖານຊີ້ວ່າ ການຄວ່ຳບາດກາຕາຣນັ້ນ ບໍ່ກ່ຽວກັບການປາບປາມກຸ່ມກໍ່ການຮ້າຍຕາມທີ່ເຄີຍກ່າວອ້າງ ແຕ່ເປັນຄວາມຕ້ອງການທີ່ຈະຈຳກັດອະທິປະໄຕຂອງກາຕາຣ ແລະແຊກແຊງນະໂຍບາຍການຕ່າງປະເທດຂອງກາຕາຣ" ລັດຖະມົນຕີຕ່າງປະເທດກ່າວ

ດ້ານທ່ານອັລວາ ກາຣກາຊ ລັດຖະມົນຕີຕ່າງປະເທດຂອງສະຫະລັດອາຫລັບອີມິເຣດລະບຸວ່າ ຫາກກາຕາຣ ບໍ່ປະຕິບັດຕາມຂໍ້ຮຽກຮ້ອງທັງ 13 ຂໍ້ ກໍ່ຈະເຫລືອທາງອອກພຽງທາງດຽວຄື ຕັດຄວາມສຳພັນທີ່ມີກັບກາຕາຣລົງທັງໝົດ ພ້ອມທັງຢ້ຳວ່າ ທີ່ດຳເນີນການແບບນີ້ບໍ່ມີເຈດຕະນາໂຄ່ນລົ້ມລັດຖະບານກາຕາຣແຕ່ຢ່າງໃດ

ທັງນີ້ສີ່ຊາດອາຫລັບໄດ້ດຳເນີນມາດຕະການຄວ່ຳບາດກາຕາຣ ໂດຍປິດເສັ້ນທາງການນຳເຂົ້າສິນຄ້າ ແລະການຈາລະຈອນທາງອາກາດນານກ່ວາ 2 ອາທິດແລ້ວ ແຕ່ກາຕາຣຍັງຄົງສາມາດນຳເຂົ້າອາຫານແລະສິນຄ້າຈຳເປັນຈາກອີຣ່ານແລະຕຸລະກີໄດ້ ລັດຖະບານກາຕາຣ ຍັງປະຕິເສດວ່າ ບໍ່ໄດ້ສະໜັບສະໜຸນການກໍ່ການຮ້າຍແລະພະຍາຍາມທຳລາຍສະຖຽນລະພາບໃນພູມິພາກຕາມທີ່ຖືກກ່າວຫາ

ດ້ານສະຖານີໂທລະທັດອັລຈາຊີຣາຖະແຫລງຢືນຢັນວ່າ ທີ່ຜ່ານມາໄດ້ໃຊ້ສິດເສລີພາບໃນການລາຍງານຂ່າວຢ່າງມືອາຊີບ ໂດຍບໍ່ຍອມກົ້ມຫົວໃຫ້ກັບແຮງກົດດັນຈາກລັດຖະບານຫລືຜູ້ມີອຳນາດຄົນໃດ ແຕ່ສື່ຊາດອາຫລັບຕ້ອງການບັ່ນທອນເສລີພາບໃນການສະແດງຄວາມເຫັນຂອງສື່ມວນຊົນ


ກາຕາຣປະຕິເສດຂໍ້ຮຽກຮ້ອງ 13 ຂໍ້ຂອງຊາດອາຫລັບ Reviewed by makarow on 2:45:00 AM Rating: 5

Contact Form

Name

Email *

Message *

Powered by Blogger.