ຂ່າວດ່ວນ

ຂ່າວອື່ນໆ

random

ການນຳ 15 ແຂວງ ຂອງ ລາວ ໄດ້ຮັບຫລຽນໄຊ ຂອງ ປະທານປະເທດຫວຽດນາມ



       * ໃນວັນທີ 5 ກໍລະກົດ ຜ່ານມາ, ຢູ່ສູນປະຊຸມໃຫຍ່ແຂວງ ເຊີນລາ ໄດ້ຈັດພິທີປະດັບຫລຽນໄຊ ຂອງ ປະທານປະເທດແຫ່ງສສ ຫວຽດນາມ ໃຫ້ແກ່ການນຳ 15 ແຂວງ ຂອງ ສປປ ລາວ. ນີ້ແມ່ນເຫດການສຳຄັນໜຶ່ງ ໃນການເຄື່ອນໄຫວສະເຫລີມສະຫລອງ ປີ ສາມັກຄີມິດຕະພາບລາວ-ຫວຽດນາມ 2017, ຊຶ່ງ ແຂວງ ເຊີນລາ ໄດ້ຖືກມອບໝາຍຈາກພັກ-ລັດຖະບານຫວຽດນາມ ຕາງໜ້າໃຫ້ 10 ແຂວງ ຂອງ ສສ ຫວຽດນາມ ທີ່ມີເສັ້ນຊາຍແດນຮ່ວມກັນກັບ ສປປ ລາວ ຈັດການສະເຫລີມສະຫລອງ ສອງ ວັນປະຫວັດສາດ ຄື 55 ປີ ວັນສ້າງຕັ້ງສາຍພົວພັນການທູດ ແລະ 40 ປີ ວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ.

         ເຂົ້າຮ່ວມໃນພິທີປະດັບຫລຽນໄຊ ໃນຄັ້ງນີ້ ມີ ສະຫາຍນາງ ປານີ ຢາທໍ່ຕູ້, ກຳມະການກົມການເມືອງ ສູນກາງພັກ, ປະທານສະພາແຫ່ງຊາດ ແຫ່ງ ສປປ ລາວ, ສະຫາຍນາງ ຫງວຽນທິກີມເງິນ, ກຳມະການກົມການເມືອງ ສູນກາງພັກ, ປະທານສະພາແຫ່ງຊາດ ແຫ່ງ ສສ ຫວຽດນາມ, ສະຫາຍ ຮວ່າງວັນເຈິດ, ເລຂາຄະນະພັກແຂວງ, ປະທານຄະນະກຳ ມະການປົກຄອງ ປະຊາຊົນ ແຂວງ ເຊີນລາ, ມີບັນດາສະຫາຍ ເລຂາ-ຮອງເລຂາ, ເຈົ້າແຂວງ-ຮອງເຈົ້າແຂວງ, ປະທານສະພາປະຊາຊົນ 16 ແຂວງ ຈາກ ສປປ ລາວ ແລະ 10 ແຂວງ  ຂອງ ຫວຽດນາມ ທີ່ມີຊາຍແດນຕິດກັບ ສປປ ລາວ ພ້ອມຜູ້ຕາງໜ້າບັນດາກະຊວງ, ຂະແໜງການ ຈາກທ້ອງຖິ່ນ ແລະ ສູນກາງ ທັງສອງປະເທດ, ເອກອັກຄະລັດຖະທູດ ວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ແລະ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສສ ຫວຽດນາມ ປະຈຳ ສປປ ລາວ ກໍໄດ້ເຂົ້າຮ່ວມຢ່າງພ້ອມພຽງ.

         ໃນພິທີ, ສະຫາຍ ຮວ່າງວັນເຈິດ, ເລຂາຄະນະພັກແຂວງ, ປະທານຄະນະກຳມະການປົກຄອງ ປະຊາຊົນ ແຂວງ ເຊີນລາ ກ່າວວ່າ: ຄວາມສໍາພັນທີ່ເປັນມູນເຊື້ອ, ຄວາມສາມັກຄີແບບພິເສດ ລະຫວ່າງສອງປະເທດ ໄດ້ຮັບການສ້າງຂຶ້ນມາ ຕະຫລອດໄລຍະເວລາແຫ່ງການຕໍ່ສູ້, ປົກປັກຮັກສາ ແລະ ສ້າງສາປະເທດຊາດ ຂອງ ສອງປະເທດ. ພິທີປະດັບຫລຽນໄຊ ຂອງ ປະທານປະເທດແຫ່ງ ສສ ຫວຽດນາມ ໃຫ້ບັນດາການນຳ ຂອງ 15 ແຂວງ ແຫ່ງ ສປປ ລາວ ໃນຄັ້ງນີ້ ແມ່ນສະແດງເຖິງຄວາມຮູ້ບຸນຄຸນ ໃນການປະກອບສ່ວນອັນໃຫຍ່ຫລວງ ໃນການເສີມຂະຫຍາຍ ແລະ ເພີ່ມທະວີຄວາມສຳພັນ ທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ຂອງ 15 ແຂວງ, ເວົ້າສະເພາະ ແລະ ຂອງພັກ, ລັດຖະບານ ແລະ ປະຊາຊົນ ບັນດາເຜົ່າ ຂອງ ລາວ ເວົ້າລວມ ໃຫ້ແກ່ຫວຽດນາມ ຕະຫລອດໄລຍະຜ່ານມາ.

         ຕາງໜ້າໃຫ້ພັກ-ລັດຖະບານຫວຽດນາມ, ສະຫາຍ ນາງ ຫງວຽນທິກີມເງິນ, ກຳມະການກົມການ ເມືອງ ສູນກາງພັກ, ປະທານສະພາແຫ່ງຊາດ ແຫ່ງ ສສ ຫວຽດນາມ ໄດ້ປະດັບຫລຽນໄຊ ເອກະລາດຊັ້ນ II, ໃຫ້ແກ່ບັນດາເຈົ້າແຂວງໆ ຂອງ ລາວ ຈຳນວນ 11 ສະຫາຍ, ປະດັບຫລຽນໄຊເອກະລາດຊັ້ນ III ໃຫ້ບັນດາຮອງເຈົ້າແຂວງ ຂອງ ລາວ ຈຳນວນ 14 ສະຫາຍ ແລະ ແລະ ປະດັບຫລຽນໄຊ ແຮງງານຊັ້ນ I ໃຫ້ ເຈົ້າແຂວງ ເຊກອງ, ອັດຕະປື ແລະ ຜົ້ງສາລີ. 

         ໃນບັນຍາກາດທີ່ເຕັມໄປດ້ວຍຄວາມໝາຍ ແລະ ອົບອຸ່ນນີ້, ສະຫາຍ ເພັດຖາວອນ ພິລະວັນ, ເລຂາພັກແຂວງ, ເຈົ້າແຂວງໆ ຫລວງນ້ຳທາ ໄດ້ຕາງໜ້າໃຫ້ບັນດາສະຫາຍ ທີ່ໄດ້ຮັບຫລຽນໄຊ ຈາກປະທານປະເທດຫວຽດນາມ ໃນຄັ້ງນີ້ ໄດ້ສະແດງຄວາມຮູ້ບຸນຄຸນຕໍ່ພັກ, ລັດຖະບານຫວຽດນາມ ທີ່ໄດ້ມອບຂອງຂວັນອັນລ້ຳຄ່ານີ້, ຊຶ່ງເປັນການສະແດງ ໃຫ້ເຫັນເຖິງ ການເສີມຂະຫຍາຍ, ເພີ່ມພູນຄູນສ້າງ ຄວາມສຳພັນທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານລາວ-ຫວຽດນາມ ຈະໝັ້ນຄົງຂະນົງ ແກ່ນຕະຫລອດໄປ.

ເນື້ອໃນ: ຂປລ
ການນຳ 15 ແຂວງ ຂອງ ລາວ ໄດ້ຮັບຫລຽນໄຊ ຂອງ ປະທານປະເທດຫວຽດນາມ Reviewed by makarow on 5:29:00 PM Rating: 5

Contact Form

Name

Email *

Message *

Powered by Blogger.