ຂ່າວດ່ວນ

ຂ່າວອື່ນໆ

random

ໂຄງການກໍ່ສ້າງທາງລົດໄຟ ລາວ-ຈີນ ມີຄວາມຄືບໜ້າ 30%

ໂຄງການກໍ່ສ້າງທາງລົດໄຟ ລາວ-ຈີນ ມີຄວາມຄືບໜ້າ 30%

ໂຄງການ​ກໍ່ສ້າງ​ທາງ​ລົດໄຟແຕ່​ຊາຍ​ແດນ ລາວ-ຈີນ ຫາ​ນະຄອນ​ຫຼວງ​ວຽງ​ຈັນ ມີ​ຄວາມ​ຍາວທັງ​ໝົດ 417 ກິໂລແມັດ ແລວທາງ​ລົດໄຟ​ໄດ້​ຜ່ານ 5 ແຂວງຄື: ຫຼວງ​ນ້ຳ​ທາ ອຸດົມ​ໄຊ ຫຼວງ​ພະບາງ ວຽງ​ຈັນ ແລະ ນະຄອນຫຼວງ​ວຽງ​ຈັນ ໃນ​ນີ້ ປະກອບ​ມີ 32 ສະຖານີ ​ກໍ່ສ້າງຂົວ​ໃໝ່ 167 ແຫ່ງ ເຈາະ​ອຸ​ໂມງ 75 ແຫ່ງ ອັດຕາ​ສ່ວນ​ຂົວ ແລະ ອຸ​ໂມງ ເທົ່າກັບ 62% ເສັ້ນທາງ​ລົດໄຟ​ຜ່ານເຂດ​ພູ​ດອຍ ກວມ​ເອົາ 80% ສ່ວນ​ທີ່​ເຫຼືອແມ່ນ​ພູ​ພຽງ ແລະ ທົ່ງພຽງ ແຜນ​ກໍ່ສ້າງ​ສຳ​ລັດ 5 ປີ (2016-2021).
ກະຊວງ​ໂຍທາ​ທິ​ການ ແລະ ຂົນສົ່ງ​ ໄດ້​ຈັດ​ກອງ​ປະຊຸມ​ຄະນະ​ຊີ້ນຳ​ໂຄງການ​ກໍ່ສ້າງ​ທາງ​ລົດໄຟແຕ່​ຊາຍ​ແດນ ລາວ-ຈີນ ຫານະຄອນ​ຫຼວງ​ວຽງ​ຈັນ ຂຶ້ນ​ວັນ​ທີ 19 ກໍລະກົດ 2017 ທີ່​ກະຊວງ ເປັນປະທານ​ຂອງ​ທ່ານ ບຸນ​ຈັນ ສິນທະ​ວົງ ລັດຖະມົນຕີກະຊວງ​ໂຍທາ​ທິ​ການ ແລະ ຂົນສົ່ງ ຫົວໜ້າຄະນະ​ຊີ້​ນຳ​ໂຄງການ​ກໍ່ສ້າງ​ທາງລົດໄຟ ລາວ-ຈີນ ມີ​ຄະນະ​ຄຸ້ມຄອງ​ໂຄງການ​ກໍ່ສ້າງ​ທາງ​ລົດໄຟ ລາວ-ຈີນ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ທ່ານ ລັດຕະນະມະນີ ຄູນ​ນີ​ວົງ ຮອງ​ລັດຖະມົນຕີ ຫົວໜ້າ​ຄະນະຄຸ້ມ​ຄອງ​ໂຄງການ​ກໍ່ສ້າງ​ທາງ​ລົດໄຟ ລາວ-ຈີນ ລາຍ​ງານ​ໃຫ້​ຮູ້ວ່າ: ພາຍຫຼັງ​ລົງມື​ໂຄງການ​ເລີ່ມແຕ່​ເດືອນ​ທັນວາ 2016 ມາ​ຮອດປັດຈຸບັນ ສາມາດ​ກໍ່ສ້າງ​ທາງ​ລົດໄຟ ລາວ-ຈີນ ໄດ້ 130,67 ກິ​ໂລແມັດ ເທົ່າ​ກັບ 31,35% ຂອງຄວາມ​ຍາວທັງ​ໝົດ 417 ກິ​ໂລແມັດ ໄດ້​ຊີ​ເຈາະ​ອຸ​ໂມງ 49 ອຸໂມງ ໃນ 101 ຈຸດ​ກໍ່ສ້າງ ລວມຄວາມ​ຍາວໄດ້ 5.835,6 ແມັດ ຊີ​ເຈາະ​ເສົາ​ຂົວ​ໄດ້ 268 ເສົາ ຕິດຕັ້ງ​ໂຮງ​ໂມ້​ຊີມັງ​ສຳເລັດ 14 ແຫ່ງ ຫ້ອງ​ທົດ​ລອງ 18 ແຫ່ງ ກໍ່ສ້າງແຄ່ມ​ສຳລັບ​ຜູ້​ຮັບ​ເໝົາ 88 ແຫ່ງ ທີ່​ສຶກ​ສາ​ໂຄງການ 12 ແຫ່ງ​ລວມ 100 ແຫ່ງ ກໍ່ສ້າງ​ທາງ​ຊອຍ​ເພື່ອເຂົ້າ​ຫາ​ສະຖານທີ່​ກໍ່ສ້າງ 657,9 ກິໂລແມັດ ຂົວ 2.342 ແມັດ ຕິດຕັ້ງ​ສາຍ​ສົ່ງ​ໄຟຟ້າ 360,2 ກິ​ໂລແມັດ ຕິດ​ຕັ້ງ​ໝໍ້​ແປງ​ໄຟ 172 ໜ່ວຍ ກໍ່ສ້າງ​ລະບົບ​ນ້ຳ​ປະປາເພື່ອ​ເຂົ້າ​ຫາ​ແຄ່ມ ແລະ ສະຖານທີ່​ກໍ່ສ້າງ 77 ກິໂລແມັດ ຄວາມຄືບ​ໜ້າ​ຂອງ​ການ​ລົງທຶນ​ທຽບໃສ່ແຜນການ​ປີ 2017 ເທົ່າ​ກັບ 30%.

ສຳລັບ​ຈຸດ​ສຸມ​ໃນ​ການ​ຈັດຕັ້ງ​ປະຕິບັດ​ແຜນການ​ກໍ່ສ້າງ​ໂຄງການ​ ແຕ່​ນີ້​ຫາ​ທ້າຍ​ປີ 2017 ສືບຕໍ່​ຕິດຕາມ​ບົດ​ລາຍ​ງານ​ກ່ຽວ​ກັບລາຄາ​ຫົວໜ່ວຍ​ຄ່າ​ຊົດ​ເຊີຍ​ສິ່ງກີດຂວາງ ແລະ ເວນ​ຄືນ​ທີ່​ດິນ ​ທີ່ໄດ້​ນຳ​ສະເໜີ​ຕໍ່​ຫົວໜ້າ​ຄະນະ​ຊີ້ນຳ​ ສືບຕໍ່​ປະສານ​ສົມທົບ​ເຈົ້າ​ໜ້າທີ່​ພາສີ ໃນ​ການ​ຄຸ້ມ​ຄອງ​ນ້ຳມັນເຊື້ອ​ໄຟ ວັດຖຸ​ອຸປະກອນ ຍານ​ພາຫະ​ນະ​ທີ່​ນຳ​ເຂົ້າ​ ໃຫ້​ຖືກຕ້ອງ​ຕາມກົດໝາຍ ລະບຽບ​ການ ແລະ ນຳໃຊ້​ຖືກ​ເປົ້າ​ໝາຍ ສືບຕໍ່​ປະສານສົມທົບ​ພາກສ່ວນ​ທີ່​ກ່ຽວຂ້ອງ ເພື່ອ​ອຳນວຍ​ຄວາມ​ສະດວກໃນການ​ນຳ​ວັດຖຸ​ອຸປະກອນ ທາດ​ລະເບີດ ເພື່ອ​ມາ​ຮັບ​ໃຊ້​ໂຄງການ ປະສານ​ສົມທົບ​ກັບ​ກົມ​ໃຫຍ່​ເສນາ​ທິ​ການ​ ໃນ​ການ​ກວດ​ກູ້​ລະເບີດ​ທີ່​ຍັງ​ບໍ່​ທັນ​ແຕກ ຕາມ​ແລວທາງ​ລົດໄຟ​ໃນ​ຈຸດ​ທີ່​ໄດ້​ໄກ່​ເກ່ຍກັບ​ປະຊາຊົນ ແລະ ມີ​ການ​ປັກຫຼັກ​ໝາຍ​ແລວ​ທາງ ແລະ ກວດກູ້​ລະເບີດ​ທາງນ້ຳ ​ໃນ​ພື້ນ​ທີ່​ຈະກໍ່ສ້າງ​ຂົວ​ແມ່ນ້ຳ​ຂອງ 2 ແຫ່ງ ແລະ ຂົວ​ນ້ຳ​ຄານ 2 ແຫ່ງ. (ຫນັງສືພິມວຽງຈັນໃຫ່ມ)
ໂຄງການກໍ່ສ້າງທາງລົດໄຟ ລາວ-ຈີນ ມີຄວາມຄືບໜ້າ 30% Reviewed by makarow on 1:50:00 AM Rating: 5

Contact Form

Name

Email *

Message *

Powered by Blogger.