ຂ່າວດ່ວນ

ຂ່າວອື່ນໆ

random

ຫຼວງພະບາງລະນຶກວັນຄ້າຍວັນເກີດຂອງປະທານສຸພານຸວົງ


ໃນວັນທີ 13 ກໍລະກົດ ນີ້ ເປັນວັນໜຶ່ງທີ່ສໍາຄັນ ແລະ ມີຄວາມໝາຍ ຊຶ່ງກົງກັບອະນຸລັກສັດນໍ້າ, ສັດປ່າ ແລະ ກົງກັບວັນເກີດຂອງ ປະທານສຸພານຸວົງ ຜູ້ນຳທີ່ແສນເຄົາລົບຮັກອີກຄົນນຶ່ງຂອງການປະຕິວັດລາວ ເຊິ່ງໄດ້ໝູນວຽນມາບັນຈົບຄົບຮອບ 108 ປີ (13 ກໍລະກົດ 1909 – 13 ກໍລະກົດ 2017) ທາງແຂວງຫຼວງພະບາງຈິ່ງໄດ້ຈັດພິທີປາທະກະຖາຂື້ນທີ່ຫໍປະຊຸມໃຫຍ່ຂອງມະຫາວິທະຍາໄລ ສຸພານຸວົງ( ບ້ານດອນເກົ່າ) ເພື່ອສະແດງຄວາມກະຕັນຍູຮູ້ບຸນຄຸນ ຕໍ່ທ່ານປະທານສຸພານຸວົງ ທີ່ໄດ້ອຸທິດຕະຫຼອດຊີວິດໃຫ້ແກ່ການປະຕິວັດ ໃຫ້ແກ່ພາລະກິດແຫ່ງການຕໍ່ສູ້ປົດປ່ອຍຊາດ ແລະ ພາລະກິດແຫ່ງການປົກປັກຮັກສາ ແລະສ້າງສາພັດທະນາປະເທດຊາດ.

    ຕອນເຊົ້າ ທ່ານ ຄໍາຂັນ ຈັນທະວີສຸກ ເຈົ້າແຂວງໆຫຼວງພະບາງ ພ້ອມດ້ວຍຄະນະ,ມີບັນດາການນໍາຂອງແຂວງ, ເມືອງ, ພະແນກການ, ກົມກອງອ້ອມຂ້າງແຂວງ ໄດ້ໄປວາງກະຕ່າດອກໄມ້ຕໍ່ໜ້າຮູບປັ້ນຂອງປະທານສຸພານຸວົງ ທີ່ບ້ານນາວຽງຄໍາ ແລະ ຢູ່ມະຫາວິທະຍາໄລສຸພານຸວົງ ພ້ອມປ່ອຍປາຈໍານວນ 4.500 ໂຕລົງສູ່ໜອງຂອງມະຫາວິທະຍາໄລສຸພານຸວົງ ຈາກນັ້ນ ໄດ້ໃຫ້ກຽດເລົ່າຄືນມູນເຊື້ອປະທານສຸພານຸວົງ ຊຶ່ງເພິ່ນເປັນເຊື້ອເຈົ້າ ເປັນໂອລົດຂອງເຈົ້າມະຫາອຸປະລາດ ບຸນຄົງ ແລະ ໝ່ອມ ຄຳອ້ວນ ໄດ້ຮັບການອົບຮົມສຶກສາເປັນຢ່າງດີທັງຮຽນຢູ່ພາຍໃນ ແລະ ຕ່າງປະເທດ ຢູ່ໃນຖານະດັ່ງກ່າວທ່ານປະທານສາມາດດຳລົງຊີວິດຢ່າງສະໜຸກສຸກສະບາຍໃນສັງຄົມແຕ່ທ່ານກໍບໍ່ເລືອກເສັ້ນທາງນັ້ນ! ໃນຂະນະທີ່ປະເທດຊາດຍັງຖືກຮຸກຮານຈາກພວກຈັກກະພັດລ່າເມືອງຂຶ້ນ ເຊິ່ງພາຍຫຼັງການປະຕິວັດເດືອນສິງຫາຢູ່ຫວຽດນາມໄດ້ຮັບໄຊຊະນະປະທານໂຮ່ຈິມິນ ກໍໄດ້ເຊີນປະທານສຸພານຸວົງ ທີ່ພວມເຮັດວຽກຢູ່ເມືອງວິນ ໄປນະຄອນຮ່າໂນ້ຍ ເພື່ອພົບປະຫຼັງຈາກນັ້ນ ເພິ່ນກໍໄດ້ຮັບການຊ່ອຍເຫຼືອຈາກຜູ້ນຳຫວຽດນາມຈັດຕັ້ງກອງທະຫານປະສົມລາວ-ຫວຽດນາມ ຂຶ້ນຢູ່ລາວ ເພື່ອດຳເນີນການຕໍ່ສູ້ຕ້ານພວກລ່າເມືອງຂຶ້ນຝຣັ່ງ ຍາດເອົາຄວາມເປັນເອກະລາດມາໃຫ້ປະຊາຊົນລາວ ການພົບປະຄັ້ງນັ້ນໄດ້ສ້າງຄວາມປະທັບໃຈຢ່າງເລິກເຊິ່ງທີ່ສຸດໃນຊີວິດການເຄື່ອນໄຫວປະຕິວັດຂອງປະທານສຸພານຸວົງ.

       ຫຼັງຈາກນັ້ນ ປະທານສຸພານຸວົງ ກໍໄດ້ເດີນທາງກັບຄືນປະເທດຕາມເສັ້ນທາງເລກທີ 9 ເມື່ອຮອດເມືອງເຊໂປນແຂວງສະຫວັນນະເຂດ ເພິ່ນໄດ້ຮັບການຕ້ອນຮັບຢ່າງອົບອຸ່ນຈາກຊາວເມືອງ ແລະ ໃນທີ່ນັ້ນ ປະທານສຸພານຸວົງ ໄດ້ກ່າວປາໄສຕໍ່ໜ້າຝູງຊົນທີ່ມາເຕົ້າໂຮມກັນຢ່າງຫຼວງຫຼາຍເປັນຄັ້ງທຳອິດ ໂດຍທ່ານໄດ້ກ່າວວ່າ “ ແຜ່ນດິນລາວຕ້ອງແມ່ນຄົນລາວເປັນເຈົ້າຂອງ ດັ່ງນັ້ນ ພວກເຮົາທຸກຄົນຕ້ອງສາມັກຄີກັນ ໂຮມແຮງກັນຕໍ່ສູ້ກູ້ຊາດອັນແສນຮັກຂອງພວກເຮົາຄືນມາໃຫ້ໄດ້ ”  ຄຳເວົ້ານີ້ ໄດ້ກາຍເປັນກຳລັງແຮງມະຫາສານປະກອບສ່ວນເຂົ້າໃນການປຸກລະດົມປະຊາຊົນລາວບັນດາເຜົ່າໃຫ້ສາມັກຄີກັນລຸກຂຶ້ນຕໍ່ສູ້ຕ້ານພວກລ່າເມືອງຂຶ້ນແບບເກົ່າ ແລະ ແບບໃໝ່ໃນເວລາຕໍ່ມາ.

    ນີ້ແມ່ນຈຸດເລີ່ມຕົ້ນແຫ່ງພາລະກິດປະຕິວັດທີ່ຍິ່ງໃຫຍ່ຂອງປະທານສຸພານຸວົງ ເປັນບາດລ້ຽວໃຫຍ່ຫຼວງທີ່ສຸດໃນຊີວິດຂອງເພິ່ນ ເປັນການເປີດສາກໄລຍະແຫ່ງການອຸທິດເລືອດເນື້ອເຫື່ອແຮງ ແລະ ສະຕິປັນຍາເຂົ້າໃນພາລະກິດຕໍ່ສູ້ກູ້ຊາດຂອງປະຊາຊົນລາວຕ້ານພວກລ່າເມືອງຂຶ້ນແບບເກົ່າ ແລະ ແບບໃໝ່  ປີ 1945 ປະຊາຊົນລາວໄດ້ລຸກຮືຂຶ້ນຍຶດອຳນາດຢູ່ວຽງຈັນ ແລະ ໄດ້ປະກາດສ້າງຕັ້ງລັດຖະບານລາວອິດສະຫຼະຂຶ້ນ ປະທານສຸພາສຸວົງ ກໍໄດ້ຮັບການແຕ່ງຕັ້ງໃຫ້ເປັນລັດຖະມົນຕີວ່າການກະຊວງການຕ່າງປະເທດທັງດຳລົງຕຳແໜ່ງຜູ້ບັນຊາການສູງສຸດຂອງກອງກຳລັງປະກອບອາວຸດອິດ ສະຫຼະ ພາຍໃຕ້ການບັນຊາຂອງເພິ່ນແມ່ນມີຫຼາຍບັ້ນຮົບເດັ່ນ ໃນນັ້ນ ກໍມີບັ້ນຮົບປ້ອງກັນໂຕເມືອງທ່າແຂກທີ່ລືຊື່ ເມື່ອພວກລ່າເມືອງຂຶ້ນຝຣັ່ງ ກັບຄືນມາຮຸກຮານປະເທດເຮົາເປັນຄັ້ງທີສອງ ເຖິງວ່າພວກສັດຕູຈະມີກຳລັງພົນພ້ອມອາວຸດຍຸດທະພັນຫຼາຍກວ່າ ແລະ ທັນສະໄໝກວ່າຫຼາຍເທົ່າ ພ້ອມທັງໄດ້ຮັບການສະໜັບສະໜູນຈາກເຮືອນບິນຖິ້ມລະເບີດຈຳນວນຫຼາຍລຳ ແຕ່ກຳລັງປະກອບອາວຸດປະສົມລາວ-ຫວຽດນາມ ພາຍໃຕ້ການບັນຊາຂອງປະທານສຸພານຸວົງ ກໍໄດ້ສູ້ຮົບຢ່າງພິລະອາດຫານຫຼາຍວັນ ສົ່ງຜົນໃຫ້ເພິ່ນໄດ້ຮັບບາດເຈັບສາຫັດຈິ່ງຍອມໄປປິ່ນປົວ ແລະ ກັບຄືນມາສືບຕໍ່ນຳພາການປະຕິວັດຈົນໄດ້ຮັບໄຊຊະນະ.

      ພາຍຫຼັງປະເທດຊາດໄດ້ຮັບການປົດປ່ອຍຢ່າງສົມບູນ ປະທານສຸພານຸວົງ ກໍໄດ້ຮັບພາລະໜ້າທີ່ໜັກໜ່ວງ ແລະ ຍິ່ງໃຫຍ່ໃນນາມປະທານປະເທດ ທັງເປັນປະທານສະພາປະຊາຊົນສູງສຸດ ເຊິ່ງທ່ານປະທານສຸພານຸວົງ ໄດ້ເຮັດວຽກຢ່າງໜັກຮ່ວມກັບຄະນະນຳເພື່ອນຳພາປະເທດຊາດທີ່ຍັງອ່ອນນ້ອຍ ແລະ ຖືກສັດຕູບີບຮັດໃນທຸກດ້ານໃຫ້ສາມາດຜ່ານຜ່າພາຍຸລົມແດງມາໄດ້ ແລະ ເຕີບໃຫຍ່ຂຶ້ນຢ່າງໝັ້ນຄົງເຖິງປັດຈຸບັນ.

     ພ້ອມດຽວກັນນັ້ນທ່ານເຈົ້າແຂວງຍັງໄດ້ຮຽກຮ້ອງໃຫ້ ພະນັກງານ ສະມາຊິກພັກ ທະຫານຕຳ ຫຼວດ, ນັກຮຽນ-ນັກສຶກສາ,  ກຳມະກອນ ແລະ ປະຊາຊົນບັນດາເຜົ່າທີ່ເປັນຜູ້ສືບທອດ ຄວນສະແດງອອກເຖິງຄວາມກະຕັນຍູຮູ້ຄຸນ ໂດຍການຮ່ຳຮຽນເອົາແບບຢ່າງການເສຍສະຫຼະຄວາມສຸກສ່ວນໂຕເພື່ອສ່ວນລວມ. ນ້ຳໃຈປະຕິວັດສຸດກົກສຸດປາຍ ການດຳລົງຊີວິດທີ່ລຽບງ່າຍ ປອດໃສ ຂາວສະອາດ ແລະ ປະຢັດຊັດທ່ຽງ ຮ່ຳຮຽນເອົານ້ຳໃຈພິລະອາດຫານບໍ່ຍອມຈຳນົນຕໍ່ສັດຕູ ແລະ ນ້ຳໃຈອົດທົນພາກພຽນດຸໝັ່ນໃນການສຶກສາຮ່ຳຮຽນ ເຖິງແມ່ນຈະຢູ່ໃນສະພາບການໃດ ປະທານສຸພານຸວົງ ກໍມີຄວາມທຸ່ນທ່ຽງ ມີຫຼັກໝັ້ນ ແລະ ເປັນແບບຢ່າງໃຫ້ແກ່ມະຫາຊົນ. ຄວາມດີດັ່ງກ່າວໄດ້ຝັງໄວ້ຢູ່ໃນດວງໃຈຂອງປະຊາ ຊົນລາວເຮົາຕະຫຼອດໄປ.
ຂ່າວ: ສີສຸວັນ (ຂ່າວສານຫລວງພະບາງ)
ຫຼວງພະບາງລະນຶກວັນຄ້າຍວັນເກີດຂອງປະທານສຸພານຸວົງ Reviewed by makarow on 11:57:00 PM Rating: 5

Contact Form

Name

Email *

Message *

Powered by Blogger.