ຂ່າວດ່ວນ

ຂ່າວອື່ນໆ

random

ຄຳມ່ວນ ສົ່ງອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ກັບຄືນປະເທດໄດ້ແລ້ວ 2 ພັນກວ່າສາກສົບ


ທ່ານ ບຸນ​ສ່ຽງ ຊາ​ພັກດີ ຮອງ​ຫົວໜ້າພະ​ແນ​ກ​ແຮງ​ງານ ​ແລະ ສະຫວັດດີ​ການ​ສັງຄົມ ​ແຂວງ​ຄຳ​ມ່ວນ ​ໃຫ້​ສຳພາດ​ຕໍ່ນັກ​ຂ່າວ ​ເນື່ອງ​ໃນ​ໂອກາດ​ສະ​ເຫຼີມສະຫຼອງວັນ​ເຊັນ​ສົນທິສັນຍາ​ມິດຕະພາບ ​ແລະ ການ​ຮ່ວມ​ມື ຄົບຮອບ 40 ປີ (18/7/1977-18/7/2017) ​ແລະ ວັນ​ສ້າງ​ຕັ້ງ​ສາຍ​ພົວພັນ​ການ​ທູດ​ລາວ-ຫວຽດນາມ ຄົບຮອບ 55 ປີ (5/9/1962-5/9/2017) ນີ້​ວ່າ: ການ​ພົວພັນ​ຮ່ວມ​ມື​ໃນ​ຂົງ​ເຂດ​ວຽງານ​ແຮງ​ງານ ​ແລະ ສະຫວັດດີ​ການ​ສັງຄົມ ລາວ-ຫວຽດນາມ ​ເວົ້າ​ສະ​ເພາະ​ກໍ່ຄື​ແຂວງ​ຄຳ​ມ່ວນ-ກວາງ​ບິ່ງ ​ໃນ​ໄລຍະ​ຜ່ານ​ມາ​​ແມ່ນ​ໄດ້​ມີ​ການ​ຈັດ​ກອງ​ປະຊຸມ​ເພື່ອ​ແລກປ່ຽນບົດຮຽນ​ເຊິ່ງກັນ ​ແລະ ກັນ ​ຢ່າງ​ເປັນ​ປະຈຳ ໂດຍ​ມີ​ການ​ພັດ​ປ່ຽນກັນ​ເປັນ​ເຈົ້າພາບ​​ໃນ 2 ປີຕໍ່ຄັ້ງ ​ເພື່ອ​ແລກປ່ຽນຂໍ້​ມູນ​ຂ່າວສານ​ຕາມ​ແນວທາງ​ນະ​ໂຍບາຍ​ຂອງ​ພັດ-ລັດ ທັງ​ສອງ​ປະ​ເທດ. ສ່ວນ​ແຮງ​ງານ​ຕ່າງປະ​ເທດ​ທີ່​ມາ​ເຄື່ອນ​​ໄຫວ​ຢູ່ພາຍ​ໃນ​ແຂວງຄຳ​ມ່ວນ ມີ​ທັງໝົດ 2.004 ຄົນ. ​ສະ​ເພາະ​ແຮງ​ງານ​ຊາວ​ຫວຽດນາມ 1.677 ຄົນ, ຍິງ 487 ຄົນ ​ໃນ​ນີ້​ມີ​ແຮງ​ງານ​ທີ່​ຖືກ​ດຳ​ເນີນ​ການ​ປັບ​ສະຖານະ​ພາບ ກໍ່ຄື​ແຮງ​ງານ​ທີ່​ເຮັດ​ວຽກກັບ​ຫົວໜ່ວຍທຸລະ​ກິດ​ທີ່​ມີ​ການ​ຄຸ້ມ​ຄອງ ​ແຕ່​ບໍ່ມີ​ການສະ​ເໜີນຳ​ເຂົ້າປະ​ເທດ​ຢ່າງ​ຖືກຕ້ອງ ຈຳນວນ 254 ຄົນ ​ແລະ ​ແຮ​ງງານ​ທີ່ບໍ່ມີ​ຫົວໜ່ວຍທຸລະ​ກິດ​ຄຸ້ມ​ຄອງ ຫຼື​ເອີ້ນ​ວ່າ​ແຮງ​ງານ​ຖືກ​ຊຳລະ​ສະ​ສາງ​ຈຳນວນ 1.330 ຄົນ. ​ເຊິ່ງຈຳນວນ​ແຮງ​ງານ​ດັ່ງ​ກ່າວ​ທາງ​ພະ​ແນ​ກ​ແຮງ​ງານ ​ແລະ ສະຫວັດດີ​ການ​ສັງຄົມ ຮ່ວມກັບ​ເຈົ້າໜ້າທີ່ ປກສ ​ແຂວງ​ແມ່ນ​ໄດ້​ອອກ​ບັດອະນຸຍາດ​ຊົ່ວຄາວ ​ເພື່ອ​ໃຫ້​ແຮງ​ງານ​ໄດ້​ກະກຽມກັບ​ຄືນ​ປະ​ເທດ ​ແລ້ວ​ປະຕິບັດ​ການ​ນຳ​ເຂົ້າ​ທີ່​ຖືກຕ້ອງ​ຕາມ​ກົດໝາຍ. ສຳລັບ​ການ​ຮ່ວມ​ມື​ຂຸດ​ຄົ້ນ​ອັດຖິ​ທະຫານ​ອາສາ​ສະມັກ ​ແລະ ຊ່ຽວຊານ​ຫວຽດນາມ​ທີ່​ເສຍສະຫຼະຊີວິດ​ໃນ​ປາງ​ສົງຄາມ​ຢູ່​ດິນ​ແດນ​ແຂວງ​ຄຳ​ມ່ວນ ພະ​ແນ​ກ​ແຮ​ງານ ​ແລະ ສະຫວັດດີ​ການ​ສັງຄົມ​ກໍ່​ແມ່ນໜ່ວຍງານໜຶ່ງທີ່​ສ້າງ​ເງື່ອນ​ໄຂ​​ໃຫ້​ແກ່​ກອງ​ປະຕິບັດ​ງານ 589 ຈາກ​ແຂວງ​ກວາງ​ບິ່ງ​ໄດ້​ມີ​ການ​ເຄື່ອນ​ໄຫວ ​ໂດຍ​ສະ​ເພາະ​ແມ່ນ​ການ​ນຳສະ​ເໜີ​ເອກະສານ, ອອກ​ແຈ້ງ​ການ​ຕ່າງໆ​ໃຫ້​ແກ່​ອຳນາດ​ການ​ປົກຄອງ​ຂັ້ນ​ເມືອງ, ຂັ້ນ​ບ້ານ ​ເພື່ອ​ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃນ​ການ​ເຄື່ອນ​ໄຫວ. ​ເຊິ່ງນັບ​ແຕ່​ປີ 1989 ທີ່​ໄດ້​ມີ​ການ​ເຄື່ອນ​ໄຫວ​ມາຮອດ​ປະຈຸ​ບັນ​ແມ່ນ​ສາມາດ​ຂຸດ​ຄົ້ນ ​ແລະ ຈັດ​ສົ່ງ​ອັດຖິ​ດັ່ງກ່າວ​ກັບ​ສູ່​ບ້ານ​ເກີດ​ເມືອງ​ນອນ​ໄດ້​ແລ້ວ 2.077 ​ສາກ​ສົບ. ຜ່ານ​ການ​ເຄື່ອນ​ໄຫວ​ວຽກງານ​ແຮງ​ງານ ​ແລະ ສະຫວັດດີ​ການ​ສັງຄົມ​ຂອງ​ແຂວງ​ຄຳ​ມ່ວນ ​ແລະ ວຽກງານ​ແຮງ​ງານ, ​ເສຍ​ອົງຄະ ​ແລະ ສັງ​ຄົມ ​ແຂວງ​ກວາງ​ບິ່ງ ​ແມ່ນ​ມີ​ການ​ພົວພັນ​ຮັດ​ແໜ້ນຄວາມ​ສາມັກຄີ​ຢ່າງ​ເລິກ​ເຊິ່ງ. ສຳລັບ​ທິດ​ທາງ​ໃນຕໍ່ໜ້າ​ທັງ​ສອງ​ຂະ​ແໜງການ​ດັ່ງກ່າວ​ຈະ​ໄດ້​ສືບຕໍ່ພົວພັນ​ຮ່ວມ​ມື​ໃນ​ດ້ານ​ຕ່າງໆ ​ໂດຍ​ອີງ​ຕາມ​ເນື້ອ​ໃນ​ບົດ​ບັນທຶກ​ຂອງ​ຄະນະ​ນຳ​ຂັ້ນ​ສູງ​ທັງ​ສອງ​ແຂວງ​ໃນ​ຊຸມ​ປີ​ທີ່​ຜ່ານ​ມາ.

ຂ່າວສານຄຳມ່ວນ: http://www.khammouanenews.com/
ຄຳມ່ວນ ສົ່ງອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ກັບຄືນປະເທດໄດ້ແລ້ວ 2 ພັນກວ່າສາກສົບ Reviewed by makarow on 3:31:00 AM Rating: 5

Contact Form

Name

Email *

Message *

Powered by Blogger.