ຂ່າວດ່ວນ

ຂ່າວອື່ນໆ

random

ເອກະຊົນຈະລົງທຶນ 40 ຕື້ ສ້າງພຣະເຈົ້າໃຫຍ່ ໃຫ້ກາຍເປັນແຫຼ່ງທ່ອງທ່ຽວອີກແຫ່ງໜຶ່ງຂອງແຂວງບໍ່ແກ້ວ




ໄລຍະນີ້, ຂ່າວຈາກແຂວງບໍ່ແກ້ວກຳລັງມາແຮງ ໂດຍສະເພາະແມ່ນການພັດທະນາເສດຖະກິດ-ສັງຄົມຂອງແຂວງທີ່ຈະຍູ້ໃຫ້ຈີດີພີເຕີບໂຕຕໍ່ເນື່ອງ ເຊິ່ງກ່ອນໜ້ານັ້ນກໍ່ໄດ້ອະນຸຍາດໃຫ້ນັກລົງທຶນຈີນສຳປະທານເຂດສົ້ນຂວາມິດຕະພາບລາວ-ໄທ4 (ຫ້ວຍຊາຍ-ຊຽງຂອງ) ເພື່ອພັດທະນາເປັນສູນການຄ້າ, ການລົງທຶນ ແລະ ທ່ອງທ່ຽວ.

ແຕ່ຍັງບໍ່ໝົດພຽງເທົ່ານີ້, ຫຼ້າສຸດ ອຳນາດການປົກຄອງຂັ້ນແຂວງຮ່ວມກັບພາກສ່ວນເອກະຊົນ ໄດ້ມີການປຶກສາຫາລືກ່ຽວກັບໂຄງການອອກແບບກໍ່ສ້າງພະເຈົ້າໃຫຍ່ ທີ່ມີຊື່ວ່າ: ແຫຼ່ງທ່ອງທ່ຽວພູໄຊ ( ພູ 106 ) ເຂດເທດສະບານເມືອງຫ້ວຍຊາຍແຂວງບໍ່ແກ້ວ ມີມູນຄ່າການກໍ່ສ້າງທັງໝົດ 40 ຕື້ກວ່າກີບ. ໃນວັນທີ 23 ສິງຫາ 2017 ຜ່ານມານີ້ ໂດຍການເຂົ້າຮ່ວມຂອງທ່ານ ສົມສະຫວາດ ເລັ່ງສະຫວັດ, ອະດີດ ຮອງນາຍົກລັດຖະມົນຕີ, ມີທ່ານ ປອ. ຄຳພັນ ເຜີຍຍະວົງ ເຈົ້າແຂວງໆບໍ່ແກ້ວ, ມີອົງຄະປະຈຳພັກແຂວງ, ອົງການພຸດທະສາສະໜາແຂວງບໍ່ແກ້ວ, ຕະຫຼອດຮອດພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້, ທ່ານ ສຸລິເດດ ວັນຄຳ, ອຳນວຍການບໍລິສັດດວງໃຈ ຂຶ້ນລາຍຕໍ່ກອງປະຊຸມວ່າ: ໂຄງການສຳຫຼວດ – ອອກແບບການສ້າງພຣະເຈົ້າໃຫຍ່ໃຫ້ເປັນແຫຼ່ງທ່ອງທ່ຽວດ້ານວັດທະນະທໍາພູໄຊນີ້ ແມ່ນຈະຕັ້ງຢູ່ພູ 106. ໃນນີ້, ການອອກແບບສ້າງພຣະເຈົ້າໃຫຍ່ມີຄື: ມີຄວາມກ້ວາງຂອງໜ້າຕັກຊ້າຍ ຫາ ຂວາ 1,450 cm, ຄວາມສູງ 2,375 cm, ຄວາມກ້ວາງໜ້າຫຼັງ 875 cm. ນອກນີ້ຍັງອອກແບບສະຖານທີ່ແບ່ງອອກເປັນ 3 ພາກຄື: ພາກສະຖາປະນິກ (ແຕ້ມແບບສະຖາປັດ, ອົງພະເຈົ້າໃຫຍ່, ອາຄານຫໍປະຕິບັດທໍາ, ອາຄານຫໍແຈກ, ອາຄານເຈົ້າອະທິການວັດ, ອາຄານທີ່ພັກພຣະສົງສາມະເນນ, ອາຄານລໍຖ້າຮັບສົ່ງ, ພາກສາລາຊົມວິວ 1, ພາກສາລາຊົມວິວ 2, ອາຄານບໍລິການລົດຮັບສົ່ງ, ອາຄານອາຫານ, ອາຄານຮ້ານຂາຍເຄື່ອງ, ອາຄານຫ້ອງນໍ້າສາທາລະນະ.

ພາກສ່ວນພາຍນອກມີ: ແຕ້ມແບບຈັດສັນຕອນດິນ, ເຈດີທາດ, ຂັ້ນໄດແຕ່ລະລະດັບ, ຮາວກັນຕົກ, ຈຸດພັກ, ທາງຍ່າງຂຶ້ນຂັ້ນໄດດ້ານໜ້າ, ປະຕູໂຂງ, ອ່າງນໍ້າພຸ, ກຳແພງ, ຂັ້ນໄດຂຶ້ນທາງດ້ານຫຼັງ ແລະ ລະບົບໄຟຟ້າ, ລະບົບເຄື່ອງກະຈາຍສຽງ, ລະບົບໃຊ້ນໍ້າເສຍ ເຊິ່ງມາຮອດປັດຈຸບັນ ການອອກແບບດັ່ງກ່າວແມ່ນໄດ້ສຳເລັດ 85%.

ກອງປະຊຸມຍັງໄດ້ປຶກສາຫາລືກ່ຽວການຕົບແຕ່ງຂອງສະຖານທີ່ດັ່ງກ່າວໃຫ້ເໝາະສົມກັບສະພາບແວດລ້ອມຕົວຈິງ ດ້ວຍການອອກແບບຖານເປຕົງເສີມເຫຼັກ ເພື່ອຮັບນໍ້າໜັກຂອງພຣະເຈົ້າໃຫຍ່, ການອອກແບບພື້ນຜິວ ( ການຫຼໍ່ ). ນອກນີ້, ຍັງໄດ້ປຶກສາຫາລືກ່ຽວກັບລະບົບປ້ອງກັນຟ້າຝ່າ, ລະບົບແຮງຕ້ານລົມ, ແຜ່ນດິນໄຫວ ທັງນີ້ກໍ່ເພື່ອຮັບປະກັນການອອກແບບການກໍ່ສ້າງ ເພື່ອໃຫ້ມີຄວາມທົນຕໍ່ກັບສະພາບແວດລ້ອມທີ່ຈະເກີດຂຶ້ນໃນພາຍພາກໜ້າ ແລະ ການປັບປຸງສະຖານທີ່ຕ່າງໆ.

ຂ່າວ: ບຸນເພັດ ໄຊຍະວົງ
ທີ່ມາ: ຂ່າວເສດຖະກິດ-ການຄ້າ Lao Economic Daily
ເອກະຊົນຈະລົງທຶນ 40 ຕື້ ສ້າງພຣະເຈົ້າໃຫຍ່ ໃຫ້ກາຍເປັນແຫຼ່ງທ່ອງທ່ຽວອີກແຫ່ງໜຶ່ງຂອງແຂວງບໍ່ແກ້ວ Reviewed by makarow on 7:04:00 AM Rating: 5

Contact Form

Name

Email *

Message *

Powered by Blogger.