ຂ່າວດ່ວນ

ຂ່າວອື່ນໆ

random

ກະກຽມເປີດປີທ່ອງທ່ຽວລາວ 2018

ກະກຽມເປີດປີທ່ອງທ່ຽວລາວ 2018 ໃນ​ວັນ​ທີ 4 ກັນຍາ 2017 ທີ່ສຳນັກງານ​ນາຍົກລັດຖະມົນຕີ ໄດ້​ຈັດ​ກອງ​ປະຊຸມ​ປຶກສາ​ຫາລື ແລະ ປະກອບ​ຄຳ​ເຫັນ​ໃສ່​ແຜນການ​ກະກຽມ​ເປີດ​ປີ​ທ່ອງ​ທ່ຽວລາວ 2018 ພາຍ​ໃຕ້​ການ​ເປັນປະທານ​ຂອງ​ທ່ານ ສອນ​ໄຊ ສີ​ພັນດອນ ຮອງ​ນາຍົກລັດຖະມົນຕີ​ມີ ທ່ານ ບໍ່​ແສງ​ຄຳ ວົງ​ດາລາ ລັດຖະ​ມົນຕີ​ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ບັນດາ​ຮອງ​ລັດຖະມົນຕີ ຮອງ​ເຈົ້າແຂວງ ແລະ ຮອງ​ເຈົ້າ​ຄອງ​ນະຄອນ​ຫຼວງ​ວຽງ​ຈັນ ພ້ອມ​ດ້ວຍພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ກອງ​ປະຊຸມ​ໄດ້​ຮັບ​ຟັງ​ລາຍງານ​ຄວາມ​ຄືບ​ໜ້າ ແລະ ປະກອບ​ຄຳ​ເຫັນ​ໃສ່​ບັນດາ​ວຽກ​ງານທີ່​ສຳຄັນ ໃນ​ການ​ກະກຽມ​ວຽກງານ​ດ້ານ​ຕ່າງໆ ເປັນຕົ້ນ ດ້ານບຸ​ຄະລາ​ກອນ​ຮັບຜິດຊອບ​ການກຳນົດ​ວາລະ​ການເຄື່ອນໄຫວວຽກ​ງານ​ຕ່າງໆ ການ​ກຳນົດ​ກິດຈະ​ກຳ​ການທ່ອງທ່ຽວ ໃນ​ປີ 2018 ເນື້ອ​ໃນ​ຈິດໃຈ​ການ​ຈັດ​ປີທ່ອງ​ທ່ຽວ​ລາວ 2018 ກໍ່​ຄືເນື້ອໃນ​ການ​ໂຄສະນາ​ເຜີຍແຜ່​ແຫຼ່ງທຶນ ແລະ ແຜນ​ງົບປະມານ​ໃຊ້ຈ່າຍ​ຕ່າງໆ​ການ​ອອກ​ແບບ​ສັນຍະ​ລັກ ແລະ ຄຳ​ຂວັນ​ການ​ທ່ອງທ່ຽວ ຈຸດປະສົງ​ລະດັບ​ຄາດໝາຍ ວິທີ​ການ ແລະ ມາດ​ຕະການ ຈັດຕັ້ງ​ປະຕິບັດ​ການ​ຈັດ​ປີ​ທ່ອງ​ທ່ຽວລາວ 2018.

ໃນ​ໂອກາດ​ນີ້ ທ່ານ​ຮອງ​ນາຍົກໄດ້​ເນັ້ນ​ໃຫ້​ພາກສ່ວນ ແລະ ຂະແໜງ​ການ​ທີ່​ກ່ຽວຂ້ອງ​ເອົາໃຈໃສ່ຕື່ມ​ບາງ​ດ້ານ ເປັນຕົ້ນ ເອົາໃຈໃສ່ຕໍ່​ວຽກ​ງານ​ປ້ອງ​ກັນ​ຄວາມ​ສະຫງົບ ຄວາມ​ເປັນ​ລະບຽບ​ຮຽບຮ້ອຍ ແລະ ຄວາມ​ສະອາດ​ຈົບງາມ​ໃນ​ສັງຄົມ ໂດຍ​ສະເພາະຕ້ານ ແລະ ສະກັດ​ກັ້ນປາກົດການ​ຫຍໍ້ທໍ້ ຂີ້ລັກ ປຸ້ນ​ຈີ້ ຊີງ​ຊັບ ການ​ກໍ່​ອາ​ຊະຍະ​ກຳ ແລະ ປາກົດການ​ຫຍໍ້ທໍ້​ອື່ນໆທີ່​ເປັນ​ພາບ​ພົດ​ບໍ່ດີ ປັບປຸງ​ພື້ນຖານ​ໂຄງ​ລ່າງ ເພື່ອຮອງ​ຮັບ​ການທ່ອງທ່ຽວ​ທີ່​ຈຳເປັນ ເປັນຕົ້ນ ເສັ້ນທາງ​ສະໜາມ​ບິນ ສະຖານທີ່​ທ່ອງ​ທ່ຽວ ທີ່​ພັກ ຮ້ານອາຫານ ພາຫະນະ​ຂົນສົ່ງ ລະບົບໂທລະ​ຄົມມະນາຄົມ ລວມ​ທັງການ​ບໍລິການ​ແຂກ ໂດຍ​ເນັ້ນ​ໃສ່ຄວາມ​ສະດວກ​ວ່ອງໄວ ທັນໃຈ ສະອາດ ປອດ​ໄພ ຮັກສາ​ໄດ້​ວັດທະນະ​ທຳ​ອັນ​ດີງາມ​ຂອງ​ຊາດ ຂອງ​ເຜົ່າ ການ​ນຳ​ໃຊ້​ງົບປະມານ ຕ້ອງ​ບົນ​ພື້ນຖານ​ປະຢັດ​ມັດ​ທະຍັດ​ສົມ​ເຫດ​ສົມ​ຜົນ ຫຼີກເວັ້ນ​ການຟຸມ​ເຟືອຍ ໂຄສະນາ​ເຜີຍແຜ່​ສ້າງຂະ​ບວນ​ການ ແລະ ຈັດ​ກິດ​ຈະກຳ​ຕ່າງໆ​ໃຫ້​ມີ​ບັນຍາກາດ​ຟົດຟື້ນ ມີ​ເນື້ອ​ໃນ​ສັງຄົມ​ຮັບ​ຮູ້​ຢ່າງກວ້າງຂວາງ ສາມາດ​ສ້າງຄວາມ​ເຊື່ອ​ໝັ້ນ ແລະ ດຶງ​ດູດ​ນັກທ່ອງ​ທ່ຽວ​ໄດ້​ຢ່າງ​ແທ້​ຈິງ ບັນດາອະນຸ​ກຳມະການ​ທີ່​ຮັບຜິດຊອບວຽກ​ງານ​ແຕ່​ລະ​ດ້ານ ໃຫ້​ປະສານ​ສົມທົບ​ກັນ​ຈັດ​ຕັ້ງ​ປະຕິບັດວຽກ​ງານ​ໃນ​ຄວາມ​ຮັບຜິດຊອບຂອງ​ຕົນ ໃຫ້​ມີ​ຜົນສຳເລັດ ແລະ ບັນລຸ​ຕາມ​ຄາດໝາຍ​ທີ່​ກຳນົດໄວ້ ຜູ້​ປະກອບ​ການ​ທີ່​ກ່ຽວຂ້ອງກັບ​ວຽກ​ງານ​ການທ່ອງທ່ຽວ ຕ້ອງ​ເຄື່ອນ​ໄຫວ​ຖືກຕ້ອງ​ຕາມກົດໝາຍ ແລະ ລະບຽບ​ການທັງ​ປະກອບ​ພັນທະ​ຂອງ​ຕົນ​ຢ່າງເຕັມ​ສ່ວນ ການ​ບໍລິການ​ໄດ້​ມາດຕະ​ຖານ​ຍຸຕິ​ທຳ ເດັດຂາດ​ບໍ່​ໃຫ້​ມີກໍລະນີ​ສວຍໂອກາດ ຫຼື ເອົາ​ປຽບນັກ​ທ່ອງ​ທ່ຽວ ຊຶ່ງ​ວຽກ​ງານ​ທັງໝົດ​ນັ້ນ ແມ່ນ​ເອົາໃຈໃສ່​ຊຸກຍູ້ທຸກ​ພາກສ່ວນ​ໃນ​ທົ່ວ​ສັງຄົມ​ມີສ່ວນ​ຮ່ວມ​ໃຫ້​ຫຼາຍ.

ຂ່າວ: ຫນັງສືພິມວຽງຈັນໃຫ່ມ
ກະກຽມເປີດປີທ່ອງທ່ຽວລາວ 2018 Reviewed by makarow on 2:52:00 AM Rating: 5

Contact Form

Name

Email *

Message *

Powered by Blogger.