ຂ່າວດ່ວນ

ຂ່າວອື່ນໆ

random

ແຂວງວຽງຈັນ ເຜີຍແຜ່ດຳລັດຂອງນາຍົກລັດຖະມົນຕີ ວ່າດ້ວຍກອງທຶນການທ່ອງທ່ຽວ.



  ກະຊວງຖະແຫຼງຂ່າວ,ວັດທະນະທຳ ແລະ ທ່ອງທ່ຽວ ຮ່ວມກັບ ພະແນກຖະແຫຼງຂ່າວ,ວັດທະນະທຳ ແລະ ທ່ອງທ່ຽວແຂວງວຽງຈັນ ຈັດຕັ້ງເຜີຍແຜ່ດຳລັດຂອງນາຍົກລັດຖະມົນຕີ ວ່າດ້ວຍກອງທຶນການທ່ອງທ່ຽວ ໃນວັນທີ 7 ກັນຍາ 2017 ທີ່ສູນວັດທະນະທຳແຂວງວຽງຈັນ. ຈຸດປະສົງເພຶ່ອຄວາມເປັນເອກະພາບໃນການຈັດຕັ້ງປະຕິບັດໃນຂອບເຂດທົ່ວປະເທດ ທັງຮັບປະກັນໃຫ້ກອງທຶນດັ່ງກ່າວ ມີຄວາມຍືນຍົງ ແລະ ຂະຫຍາຍຕົວ.

 ທ່ານ ຄຳຟອງ ບົວທອງ ຫົວໜ້າພະແນກຖະແຫຼງຂ່າວ,ວັດທະນະທຳ ແລະ ທ່ອງທ່ຽວແຂວງວຽງຈັນ ໄດ້ໃຫ້ຮູ້ວ່າ: ໃນປີ 2016 ມີນັກທ່ອງທ່ຽວເຂົ້າມາທ່ຽວລາວເຖິງ 4 ລ້ານກວ່າເທຶ່ອຄົນ,ສ້າງລາຍຮັບທົ່ວສັງຄົມໄດ້ 742 ລ້ານໂດລາສະຫາລັດ,ສະເພາະແຂວງວຽງຈັນເປັນແຂວງໜຶ່ງທີ່ມີທ່ແຮງດ້ານການທ່ອງທ່ຽວ ເຊິ່ງມີສະຖານທີ່ທ່ອງທ່ຽວທີ່ມີຊື່ສຽງໂດ່ງດັງ ແລະ ເປັນທີ່ນິຍົມຂອງນັກທ່ອງທ່ຽວທັງພາຍໃນ ແລະ ຕ່າງປະເທດເຊັ່ນ: ເມືອງວັງວຽງ,ອ່າງນ້ຳງຶ່ມ1 ແລະ ບ່ອນອື່ນໆ,ປີ 2016 ມີນັກທ່ອງທ່ຽວເຂົ້າມາທ່ຽວຊົມ 5 ແສນ 8 ໝື່ນກວ່າເທຶ່ອຄົນ,ເຊິ່ງສາມາດສ້າງລາຍຮັບໃຫ້ສັງຄົມຫຼາຍສົມຄວນ.
 ທ່ານ ນາງ ຄຳໄມ ເພັງພາວັນ ຮອງຫົວໜ້າກົມແຜນການ-ການເງິນ ກະຊວງຖະແຫຼງຂ່າວ,ວັດທະນະທຳ ແລະ ທ່ອງທ່ຽວກໍ່ໄດ້ໃຫ້ຮູ້ວ່າ: ການເຜີຍແຜ່ດຳລັດສະບັບນີ້ ເພຶ່ອເປັນບ່ອນອີງໃນການຈັດຕັ້ງປະຕິບັດຂັ້ນຕອນ,ວິທີການເກັບ,ການຄຸ້ມຄອງ,ການນຳໃຊ້ ແລະ ການຈັດແບ່ງກອງທຶນການທ່ອງທ່ຽວຢູ່ນະຄອນຫຼວງ ແລະ ບັນດາແຂວງໃຫ້ເປັນລະບົບ ແລະ ເປັນເອກະພາບກັນໃນຂອບເຂດທົ່ວປະເທດ ໃຫ້ຖືກຕ້ອງຕາມກົດໝາຍ ແລະ ນິຕິກຳດ້ານການເງິນ,ສອດຄ່ອງກັບສະພາບຕົວຈິງ ກັບຄວາມຕ້ອງການພັດທະນາການທ່ອງທ່ຽວ ຂອງສາທາລະນະລັດປະຊາທິປະໄຕປະຊາຊົນລາວ.ການເກັບກອງທຶນການທ່ອງທ່ຽວ ແມ່ນເກັບຈາກນັກທ່ອງທ່ຽວຕ່າງປະເທດ ທີ່ເຂົ້າມາທ່ຽວ ສາທາລະ ນະລັດ ປະຊາທິປະໄຕ ປະຊາຊົນລາວ ໂດຍຜ່ານ ຫຼື ບໍ່ຜ່ານຫົວໜ່ວຍທຸລະກິດການນຳທ່ຽວ 1 ໂດລາຕໍ່ຫົວຄົນຕໍ່ຄັ້ງໃນອັດຕາດຽວກັນທົ່ວປະເທດ,ເກັບຈາກການຈັດງານເທສະການອາຫານ,ງານວາງສແດງການທ່ອງທ່ຽວ ຫຼື ນິທັດສະການກ່ຽວກັບກິດຈະການການທ່ອງທ່ຽວ ເຊິ່ງການເກັບໃນແຕ່ລະກິດຈະການມີການຕົກລົງເປັນສະເພາະຕື່ມອີກ.

ສ່ວນການຄຸ້ມຄອງ ແລະ ການນຳໃຊ້ກອງທຶນການທ່ອງທ່ຽວ ແມ່ນຕ້ອງມີການປະສານງານສົມທົບກັນ ລະຫວ່າງ ຂະ ແໜງການຖະແຫຼງຂ່າວ,ວັດທະນະທຳ ແລະ ທ່ອງທ່ຽວ ກັບຂະແໜງສ່ວຍສາອາກອນ ແລະ ຂະແໜງການອື່ນໆ ເພຶ່ອເປັນຜູ້ຈັດຕັ້ງປະຕິບັດຢ່າງມີປະສິດທິຜົນ.
ເຂົ້າຮ່ວມມີ ທ່ານ ບຸນສອນ ເພັດລາວັນ ຮອງເຈົ້າແຂວງໆວຽງຈັນ,ມີບັນດາພາກສ່ວນທີ່ກ່ຽວຂ້ອງ ແລະ ນັກທຸລະກິດທ່ອງທ່ຽວຈຳນວນໜຶ່ງເຂົ້າຮ່ວມ.

ຂ່າວ: ແຂວງວຽງຈັນອອນລາຍ
ພາບ-ຂ່າວ : ໂດຍ : ບຸນມາ ແກ້ວບຸຸດດາ
ແຂວງວຽງຈັນ ເຜີຍແຜ່ດຳລັດຂອງນາຍົກລັດຖະມົນຕີ ວ່າດ້ວຍກອງທຶນການທ່ອງທ່ຽວ. Reviewed by makarow on 8:11:00 PM Rating: 5

Contact Form

Name

Email *

Message *

Powered by Blogger.