ຂ່າວດ່ວນ

ຂ່າວອື່ນໆ

random

ສືບຕໍ່ຊອກຫາວິທີທາງແກ້ໄຂຊາຍແດນ ລາວ-ກຳປູເຈຍ

ສືບຕໍ່ຊອກຫາວິທີທາງແກ້ໄຂຊາຍແດນ ລາວ-ກຳປູເຈຍ ວັນ​ທີ 5 ກັນຍາ 2017 ທ່ານ ສະເຫຼີມ​ໄຊ ກົມ​ມະ​ສິດ ລັດ​ຖະ​ມົນຕີ​ກະຊວງ​ການ​ຕ່າງປະເທດ​ລາວ ແລະ ທ່ານ ປຣາກ ໂສ​ກົນ ລັດ​ຖະມົນຕີ​ກະຊວງ​ການ​ຕ່າງປະເທດ ແລະ ການ​ຮ່ວມ​ມື​ສາກົນ​ກຳ​ປູເຈຍ ໄດ້​ພົບ​ປະ​ປຶກສາ​ຫາລື​ກັນ ທີ່​ນະຄອນຫຼວງ​ພະນົມ​ເປັນ ໂດຍປະຕິບັດ​ຕາມ​ການ​ຕົກລົງ​ຈັດ​ກອງປະຊຸມ​ຂອງ​ສອງ​ນາຍົກ​ລັດ​ຖະມົນຕີ​ລາວ ແລະ ກຳປູເຈຍ ຄັ້ງວັນ​ທີ 1 ກັນຍາ 2017 ທີ່​ເຫັນດີ​ເປັນ​ເອກະ​ພາບ​ກັນ ​ມອບ​ໝາຍໃຫ້​ລັດຖະມົນຕີ​ກະຊວງ​ການຕ່າງປະເທດ​ສອງ​ປະເທດ ​ພົບ​ປະປຶກສາ​ຫາລື​ກັນ ເພື່ອ​ຊອກ​ວິທີທາງ​ໃນ​ການ​ແກ້​ໄຂ​ບັນຫາ​ຊາຍແດນ​ທີ່​ຍັງ​ຄົງ​ຄ້າງ ເພື່ອ​ກ້າວ​ໄປສູ່​ການ​ປັກ​ຫຼັກ​ໝາຍ​ຊາຍ​ແດນ​ໃຫ້​ສຳເລັດ​ໂດຍ​ໄວ.

ກອງ​ປະຊຸມ​ຄັ້ງ​ນີ້ ໄດ້​ດຳເນີນ​ໄປດ້ວຍ​ບັນຍາກາດ​ທີ່​ເຕັມ​ໄປ​ດ້ວຍໄມຕີ​ຈິດ​ມິດຕະພາບ​ ຖານ​ບ້ານ​ໃກ້​ເຮືອນ​ຄຽງ ທີ່​ມີ​ມູນເຊື້ອ​ອັນ​ດີ​ມາ​ແຕ່​ບູຮານ​ນະ​ການລະຫວ່າງ​ສອງ​ປະເທດ ເຊິ່ງ​ສອງຝ່າຍ​ໄດ້​ເປັນ​ເອກະ​ພາບ​ກັນ ​ກ່ຽວກັບ​ທິດ​ທາງ​ໃນ​ການຈັດຕັ້ງ​ປະຕິບັດ​ວຽກ​ງານ ​ເພື່ອ​ແກ້​ໄຂ​ບັນຫາຊາຍ​ແດນ​ລະຫວ່າງ​ສອງ​ປະເທດ ທີ່​ຍັງ​ຄົງ​ຄ້າງ​ຮ່ວມ​ກັນ​ດັ່ງ​ນີ້: ສອງຝ່າຍ​ໄດ້​ເປັນ​ເອກະ​ພາບ​ກັນ ​ກ່ຽວກັບ​ເນື້ອ​ໃນ​ການ​ຮ່າງ​ຈົດໝາຍ​ໃນນາມ​ນາຍົກລັດຖະມົນຕີ​ລາວ ແລະ ນາຍົກລັດຖະມົນຕີ​ກຳ​ປູເຈຍ ເຖິງ​ປະທານາທິບໍດີ​ຝຣັ່ງ ເພື່ອ​ສະເໜີ​ໃຫ້​ຝຣັ່ງ​ຊ່ວຍ​ສົ່ງ​ທຸກແຜນທີ່ ແລະ ເອກະສານ​ທີ່​ກ່ຽວຂ້ອງ​ກັບ​ການ​ກຳນົດ​ເສັ້ນ​ຊາຍແດນລະຫວ່າງ ລາວ-ກຳປູເຈຍ ສະໄໝ​ຝຣັ່ງ​ປົກຄອງ ​ໃຫ້​ລັດ​ຖະບານ​ສອງ​ປະເທດ​ລາວ ແລະ ກຳປູ​ເຈຍ ເພື່ອ​ເປັນ​ພື້ນຖານ​ໃນ​ການແກ້​ໄຂບັນຫາ​ຊາຍ​ແດນ​ທີ່​ຍັງ​ຄົງຄ້າງ​ຮ່ວມ​ກັນ ສອງ​ຝ່າຍ​ຕົກລົງເປັນ​ເອກະ​ພາບ​ກັນ​ ມອບ​ໝາຍ​ໃຫ້​ຄະນະ​ກຳມະການ​ຊາຍ​ແດນ​ສອງຝ່າຍ​ ລົງ​ກວດກາ​ພື້ນ​ທີ່​ຕົວ​ຈິງ​ໃນເວລາ​ອັນ​ໃກ້ໆ ເພື່ອ​ຮ່ວມ​ກັນ​ແກ້ໄຂ​ຈຸດ​ຄົງ​ຄ້າງ​ຊາຍ​ແດນ 4 ຈຸດ​ທີ່ຂຶ້ນ​ກັບ​ແຂວງ​ຈຳປາ​ສັກ​ຂອງລາວ ແລະ ແຂວງ​ຊຽງ​ແຕງ​ຂອງກຳປູເຈຍ ເພື່ອ​ກ້າວ​ໄປ​ເຖິງ​ການປັກ​ຫຼັກ​ໝາຍ​ຊາຍ​ແດນ​ຮ່ວມ​ກັນໃຫ້​ສຳເລັດ​ໂດຍ​ໄວ ແລະ ສອງຝ່າຍ​ໄດ້​ເປັນ​ເອກະ​ພາບ​ກັນ​ ໃຫ້​ຄະນະ​ກຳມະການ​ຊາຍ​ແດນ​ສອງປະເທດ ​ມອບ​ໝາຍ​ໃຫ້​ຄະນະ​ອະນຸກຳມະການ​ເຕັກນິກ ລາວ-ກຳ​ປູເຈຍ ແລະ ກຳປູເຈຍ-ລາວ ລົງກວດກາ​ຢູ່​ພື້ນ​ທີ່​ຕົວ​ຈິງ​ບໍລິເວນຈຸດ​ຄົງ​ຄ້າງ​ແກ້ງ​ຕໍ​​ມໍ​ຄອຍ-ຫ້ວຍຕະ​ເງົາຮ່ວມ​ກັນ ຖ້າ​ຈຸດ​ໃດ​ທີ່ສອງ​ຝ່າຍ​ສາມາດ​ຕົກລົງ​ກັນ​ໄດ້ ໃຫ້​ປັກ​ຫຼັກ​ໝາຍ​ຊາຍ​ແດນ​ໄປ ພ້ອມທັງ​ນີ້ ເພື່ອ​ກ້າວ​ໄປ​ສູ່​ການປັກ​ຫຼັກ​ໝາຍ​ຊາຍ​ແດນ​ຕໍ່ໆ​ໄປ ນອກ​ນີ້ ທັງ​ສອງ​ຝ່າຍ​ຍັງ​ໄດ້​ປຶກສາ​ຫາລື​ກັນ ​ກ່ຽວ​ກັບ​ການ​ສຶກ​ສາຄວາມ​ອາດ​ສາມາດ​ເປັນ​ໄປ​ໄດ້ ​ໃນ​ການ​ປັກ​ຫຼັກ​ໝາຍ​ຖີ່​ຮ່ວມ​ກັນ​ໃນ​ຕໍ່ໜ້າ ແລະ ທັງ​ສອງ​ຝ່າຍ​ໄດ້​ລົງນາມ​ບົດ​ບັນທຶກ​ກອງ​ປະຊຸມ​ດັ່ງກ່າວ​ຮ່ວມ​ກັນ ເພື່ອ​ເປັນ​ພື້ນຖານໃຫ້​ແກ່​ການຈັດຕັ້ງ​ປະຕິບັດ​ຕໍ່​ໄປ.

ໝາກຜົນ​ຂອງ​ການ​ປຶກສາ​ຫາລື​ຂອງ ​ລັດຖະມົນຕີ​ກະຊວງ​ການຕ່າງປະເທດ​ສອງ​ປະເທດ​ຄັ້ງ​ນີ້ ແມ່ນ​ມີ​ຄວາມ​ໝາຍ​ຄວາມ​ສຳຄັນ​ຕໍ່​ການ​ພົວພັນ ແລະ ຮ່ວມ​ມື​ທີ່ດີລະຫວ່າງລາວ ແລະ ກຳ​ປູເຈຍ ຖື​ວ່າ​ເປັນ​ບາດກ້າວ​ສຳຄັນ ໃນ​ການ​ເພີ່ມ​ທະວີ​ຄວາມ​ໄວ້​ເນື້ອເຊື່ອ​ໃຈ ແລະ ການ​ຮ່ວມ​ມື​ກັນ​ໃນການ​ແກ້​ໄຂ​ບັນຫາ​ຊາຍ​ແດນ​ ທີ່ຍັງ​ຄົງ​ຄ້າງ​ໃນ​ຈຸດ​ອື່ນໆ​ທີ່​ຍັງ​ເຫຼືອ ເພື່ອ​ເຮັດ​ໃຫ້​ເສັ້ນ​ຊາຍ​ແດນ​ກາຍເປັນ​ເສັ້ນ​ຊາຍ​ແດນ​ແຫ່ງ​ສັນຕິພາບ ມິດຕະພາບ ແລະ ການຮ່ວມ​ມື​ຢ່າງ​ແທ້​ຈິງ.

ຂ່າວ: ຫນັງສືພິມວຽງຈັນໃຫ່ມ
ສືບຕໍ່ຊອກຫາວິທີທາງແກ້ໄຂຊາຍແດນ ລາວ-ກຳປູເຈຍ Reviewed by makarow on 8:17:00 PM Rating: 5

Contact Form

Name

Email *

Message *

Powered by Blogger.